I dërguari i posaçëm i ish-presidentit Donald Trump, Richard Grenell, ka reaguar ashpër ndaj një artikulli të publikuar nga Radio Evropa e Lirë (REL) për procesin gjyqësor në Hagë ndaj ish-presidentit të Kosovës, Hashim Thaçi.
Grenell e quajti raportimin të pasaktë dhe kritikoi ashpër mënyrën si ishte paraqitur kronologjia e çështjes:
“Turp për Radion Evropa e Lirë – të financuar nga taksapaguesit amerikanë. Turp për Gjykatën e Hagës – po ashtu të financuar nga amerikanët. Në artikull thuhet se ‘prokurorët i janë vënë pas Thaçit prej dy vitesh’. Kjo është e rreme. Krimet e pretenduara datojnë që nga viti 1998. Gjykata u krijua në vitin 2016, dhe Thaçi u arrestua në 2020.”
Sipas tij, takspaguesit amerikanë po financojnë një proces gjyqësor dhe raportime që, siç i cilëson ai, janë “të rreme”:
“Ne po paguajmë për një gjyq të rremë dhe për raportim të rremë të këtij gjyqi.”
Grenell ka qenë një mbështetës i zëshëm i udhëheqësve të UÇK-së dhe kritikues i ashpër i procesit në Gjykatën Speciale që po zhvillohet në Hagë.
