Në një operacion të gjerë ndërkombëtar të koduar “RapTor”, Europol dhe agjencitë ligjzbatuese të shumë vendeve kanë arrestuar 270 persona të përfshirë në rrjete kriminale që operonin në “dark web”, duke goditur trafikun e drogës, armëve, kriptovalutave dhe mallrave të falsifikuara.
Operacioni, i cili përfshiu Shtetet e Bashkuara, Gjermaninë, Mbretërinë e Bashkuar, Francën, Korenë e Jugut dhe shtete të tjera, çoi në sekuestrimin e mbi 2 ton drogë – përfshirë 144 kg fentanil –, mbi 180 armë zjarri dhe mbi 200 milionë dollarë në para dhe kriptovaluta.
SHBA kryeson me 130 arrestime, e ndjekur nga Gjermania me 42 dhe Britania me 37. Operacioni shënon një sukses të rëndësishëm në luftën globale kundër krimit të organizuar digjital dhe thekson rëndësinë e bashkëpunimit ndërkombëtar në ndjekjen e aktiviteteve kriminale që fshihen pas teknologjisë dhe anonimitetit në rrjet.