KOSOVË – Në seancën e së enjtes në Gjykata Themelore në Prishtinë, prokurori i shtetit, Naim Abazi, ka propozuar administrimin e dy raporteve juridike ndërkombëtare nga SHBA si pjesë e provave në gjyqin ndaj të akuzuarve për sulmin në Banjskë.
Sipas prokurorit, raportet përmbajnë të dhëna teknike të siguruara nga sistemet zyrtare të Google dhe Meta, të lidhura me llogarinë elektronike të të pandehurit Dushan Maksimoviq. Dokumentet përfshijnë të dhëna të abonentit, adresa IP nga Serbia, numrin e telefonit për rikuperim dhe aktivizimin e shërbimeve të lokacionit.
Në raport përfshihen gjithashtu të dhëna nga Google Maps, YouTube dhe Android, lista e kontakteve të ruajtura – ku sipas Prokurorisë figurojnë persona të identifikuar në aktakuzë – si dhe materiale fotografike të ruajtura në Google Photos, ku shfaqen armë, municion dhe persona të tjerë të përfshirë në hetim.
Prokurori Abazi theksoi se analiza e të dhënave tregon ekzistencën e një rrjeti komunikimi dhe ndërveprimi mes të akuzuarve, duke shtuar se provat janë siguruar në mënyrë të ligjshme dhe në përputhje me standardet ndërkombëtare.
Nga ana tjetër, avokati i të akuzuarit Blagoje Spasojeviq, Ljubomir Pantoviç, kundërshtoi propozimin e Prokurorisë, duke deklaruar se aktakuza nuk vërteton lidhjen e drejtpërdrejtë të klientit të tij me shumicën e provave, përveç një rasti të gjurmëve të barutit në rrobat e tij. Sipas avokatit, pjesa tjetër e provave lidhet kryesisht me mënyrën e arrestimit të të pandehurit.
Seanca pritet të vijojë me shqyrtimin e propozimeve të palëve për administrimin e provave.