Një milioner amerikan ka humbur jetën në mënyrë tragjike gjatë një udhëtimi gjuetie në Afrikën e Jugut, kur një buall i racës Cape e goditi për vdekje. Asher Watkins, 52 vjeç, nga Teksasi, u sul papritur nga kafsha gjatë një gjurmimi në zonën e Bambisana, ndërsa po përpiqej ta vriste.
Bualli, një dem me peshë mbi një ton, u bë i shqetësuar dhe agresiv, duke e përplasur Watkinsin me brirë dhe duke i shkaktuar vdekjen pothuajse të menjëhershme, sipas burimeve ndërkombëtare. Ngjarja ka tronditur familjen e tij, veçanërisht vajzën adoleshente Savannah, e cila, sipas ish-bashkëshortes së Asherit, ndodhet në gjendje shoku.
“Është një realitet që është ende e vështirë të shprehet me fjalë. Zemrat tona janë të rënda ndërsa përballemi me ditët që vijnë,” ka thënë ish-bashkëshortja, Courtney.
Asher Watkins ishte një gjuetar i pasionuar dhe shpesh postonte në rrjetet sociale foto me kafshë të vrara gjatë aventurave të tij nëpër botë – përfshirë luanë malorë dhe zogj të egër. Në një udhëtim në Argjentinë, ai ishte mburrur se kishte vrarë mijëra pëllumba brenda tre ditëve me grupin e tij të miqve.
Ngjarja ka ngjallur edhe një valë reagimesh në rrjet, ku shumë kanë vënë në pikëpyetje etikën e gjuetisë për sport dhe pasojat që sjell ndërhyrja në habitatin natyror të kafshëve të egra.
