Kompania Rejsi Farma nuk ka mjaftuar vetëm me milionat që përfiton nga tenderat në shëndetësi, por ka nisur të vendosë gjoba ndaj spitaleve rajonale për të përfituar më shumë para publike nëpërmjet furnizimit me barna të listës së rimbursueshme.
Sipas dokumenteve të siguruara, kompania ka tentuar të marrë pagesa dy herë për të njëjtat fatura, të cilat spitalet i kishin likuiduar në fund të çdo muaji, bazuar në konsumimin mujor të medikamenteve dhe akt-rakordimet përkatëse. Megjithatë, Rejsi Farma ka lëshuar fatura shtesë, duke injoruar pagesat e mëparshme.
Përmes një vendimi të Gjykatës së Fierit, kompania ka tentuar edhe të ekzekutojë këto fatura me përmbarues privat, duke bllokuar fillimisht llogarinë bankare të Spitalit Rajonal të Fierit. Bëhet fjalë për periudhën mars–korrik 2025, ku Rejsi Farma ka lëshuar një faturë prej afro 120 milionë lekë të vjetra në mënyrë të dyshuar abuzive.
Fondi i Detyrueshëm i Kujdesit Shëndetësor dhe Spitali Rajonal i Fierit kundërshtuan pagesën, duke paditur kompaninë në gjykatë dhe kërkuar pezullimin e vendimit fillestar dhe pavlefshmërinë e titullit ekzekutiv për faturat e dyshuara. Të dy institucionet paraqitën në gjykatë faturat mujore të likuiduara si prova të pagesave të kryera.
Në bazë të dokumentacionit të paraqitur, gjyqtari Aurel Arapi, në një seancë të zhvilluar në Tiranë në fillim të shkurtit, vendosi pezullimin e vendimit të Gjykatës së Fierit, duke bllokuar ekzekutimin privat të faturave. Ky vendim rrëzon përpjekjen e Rejsi Farmës për të përfituar dyfish para nga buxheti i shtetit, i destinuar për rimbursimin e barnave spitalore në rrethe.