Gjermania miratoi të premten 3 miliardë euro (3.25 miliardë dollarë) ndihmë të re ushtarake për Ukrainën.
Paratë janë të destinuara për pajisje mbrojtëse për vendin që lufton forcat ruse, duke përfshirë municione, dronë, automjete të blinduara dhe sisteme të mbrojtjes ajrore.
Komisioni i buxhetit i parlamentit në Gjermani dha dritën jeshile për fondet, të cilat ishin pezulluar prej muajsh mes mosmarrëveshjeve në qeverinë e koalicionit të kancelarit në largim Olaf Scholz.
Por miratimi përfundimtar të premten i një pakete të re të madhe shpenzimesh që lehtësoi gjithashtu rregullat strikte të borxhit të Gjermanisë për shpenzimet e mbrojtjes, i dha qeverisë hapësirë të re për manovrim.
Presidenti ukrainas Volodymyr Zelensky falënderoi Gjermaninë për ndihmën e re në një postim në X, duke thënë se ajo do të sigurojë “pikërisht atë që Ukraina ka nevojë më shumë – atë që shpëton jetë ukrainase”, transmeton Telegrafi.
“Kjo do të thotë se kontratat me industrinë gjermane të mbrojtjes do të nënshkruhen tani për të ardhmen – një hap i rëndësishëm drejt ndërtimit të garancive afatgjata të sigurisë”, tha Zelensky.
“Është gjithashtu një njohje që ushtria e Ukrainës do të bëhet edhe më e fortë pas përfundimit të luftës dhe Gjermania është e përkushtuar të kontribuojë në këtë”, shtoi presidenti ukrainas.
Deputetja e të Gjelbërve, Britta Hasselmann, partia e së cilës ka kërkuar fuqimisht ndihmën për Ukrainën, shprehu lehtësimin që miliardat e reja po liroheshin, “ndonëse vonë”.
Ajo e quajti atë “një sinjal të fortë për Ukrainën, një sinjal që është absolutisht i nevojshëm për paqen dhe sigurinë në Evropë”.