Politikanë dhe ekspertë të sigurisë në Gjermani kanë ngritur alarmin për rrezikun e sulmeve të mundshme iraniane në Evropë, pasi gazeta iraniane “Hamshahri” publikoi një listë me politikanë perëndimorë që, sipas saj, duhet të përballen me “hakmarrjen e popullit iranian”.
Mes emrave të përfshirë në listë është edhe kancelari gjerman, Friedrich Merz.
Deputeti konservator Roderich Kiesewetter deklaroi se regjimi iranian mund të ketë planifikuar prej kohësh atentate dhe sulme terroriste në vendet perëndimore, përfshirë edhe Gjermaninë. Sipas tij, Teherani përdor terrorizmin si mjet për të forcuar pozitat e tij si brenda vendit ashtu edhe në arenën ndërkombëtare.
Nga ana tjetër, kryetari i Komisionit Parlamentar për Mbikëqyrjen e Shërbimeve Sekrete, Marc Henrichmann, theksoi se ky zhvillim tregon nevojën për vigjilencë më të madhe. Ai paralajmëroi se shërbimet iraniane mund të organizojnë operacione edhe në Evropë përmes personave të rekrutuar për misione të veçanta.
Shqetësimin e kanë ndarë edhe përfaqësues të Partisë Socialdemokrate dhe të Gjelbërve. Deputeti Konstantin von Notz u shpreh se publikimi i kësaj liste ka shumë gjasa të jetë bërë me miratimin e udhëheqjes iraniane dhe përfaqëson një përshkallëzim të ri të kërcënimeve ndaj politikanëve perëndimorë.