Gazetari Roland Qafoku ishte i ftuar në emisionin “Breaking” me Xhoi Malësia në Top News, ku foli për ndarjen e parakohshme nga jeta të publicistit dhe analistit Artur Zheji. Gjatë bisedës, Qafoku ndau një episod të veçantë nga një intervistë që kishte zhvilluar me Zhejin, duke zbuluar detaje të panjohura mbi miqësinë e tij me kryeministrin Edi Rama.
Sipas Qafokut, Artur Zheji dhe Edi Rama kanë qenë miq të ngushtë që në fëmijëri, një lidhje që daton shumë vite më parë. Ai theksoi se edhe reagimi i Ramës pas ndarjes nga jeta të Zhejit ishte “plot kode”, që sipas tij tregojnë për një lidhje të veçantë mes tyre.
Në intervistën e tij me Zhejin, ky i fundit kishte rrëfyer një episod domethënës nga periudha e shkollës. Në atë kohë, Zheji ishte pak më i madh në moshë dhe ishte përjashtuar nga shkolla, ndërkohë që vijonte të shoqërohej me Edi Ramën. Prindërit e Ramës, të shqetësuar për ndikimin që kjo miqësi mund të kishte mbi të birin, i ishin drejtuar Zhejit me lutjen që të hiqte dorë nga shoqëria me të, nga frika se edhe Rama mund të përjashtohej nga shkolla.
“Prindërit i thanë: ‘Hiq dorë nga miqësia me djalin tonë’. Ata kishin frikë për të ardhmen e tij. Por kjo u kapërcye dhe dyshja mbeti përherë miq të mirë,” tregoi Qafoku.
“Rama ishte një ndër miqtë e tij më të afërt të Artur Zhejit. Ata njihen prej shumë vitesh.
Po ta shihje dhe reagimi i Ramës për ndarjen nga jeta ishte plot kode.
Në intervistën që kam patur me Zhejin, më tregoi një episod të veçantë në raportin e tyre.
Ka qenë koha kur Rama ishte në shkollë, teksa Zheji ishte pak më i madh se ai.
Zhejin e kishin përjashtuar nga shkolla dhe ndërkohë vijonte të shoqërohej me Ramën.
Prindërit e këtij të fundit ishin të shqetësuar sepse thoshin që djali ynë po merr rrugë të keqe.
Kishin frikë se e përjashtonin dhe Ramën.
Ata takuan Zhejin dhe i thanë ‘Hiq dorë nga miqësia me djalin tonë’. Kjo pastaj u kalua dhe ata mbetën miq të mirë”, tregoi Qafoku.