Bota e futbollit është tronditur nga lajmi i ndarjes nga jeta të ish-sulmuesit të Beninit, Razak Omotoyossi, në moshën 39-vjeçare. Lajmi u bë publik të martën dhe shkaktoi një valë ngushëllimesh nga tifozë, ish-bashkëlojtarë dhe klubet ku ai ka luajtur. Shkaku i vdekjes së tij nuk është bërë ende i ditur.
Omotoyossi, i lindur në Nigeri por që përfaqësoi kombëtaren e Beninit, është golashënuesi i dytë më i mirë në historinë e vendit me 21 gola në 55 ndeshje për “Cheetahs” gjatë një karriere 12-vjeçare. Ai ka luajtur për 15 klube të ndryshme, përfshirë Helsingborgs, Al-Nassr, Metz dhe Zamalek, para se të tërhiqej nga futbolli profesionist në vitin 2021.
Klubet ku ka luajtur kanë reaguar menjëherë. Helsingborgs IF në X shkroi: “Jemi në zi. Mendimet tona janë me familjen dhe të afërmit e tij. U prehsh në paqe, Razak.” Ndërsa Syrianska FC shprehu dhimbjen: “Ngushëllime të sinqerta familjes dhe të dashurve të tij. U prehsh në paqe.”
Mesazhe prekëse kanë ardhur edhe nga tifozët: “I pikëlluar thellësisht për humbjen e Razak Omotoyossi-t. Mendimet e mia janë me familjen e tij, miqtë dhe ish-bashkëlojtarët.”
Omotoyossi do të mbahet mend si një futbollist i talentuar, i dashur nga tifozët dhe një figurë e rëndësishme e futbollit afrikan. Lajmi vjen vetëm pak orë pas vdekjes së ish-sulmuesit tjetër afrikan, Tendai Ndoro, duke tronditur sërish komunitetin e futbollit në kontinent.