Një 35-vjeçar shqiptar ka rënë në prangat e policisë italiane pasi në automjetin që drejtonte u zbuluan mbi 9 kilogramë kokainë e pastër, me një vlerë tregu që kalon 1 milion euro nëse do të shpërndahej në doza.
Arrestimi u krye nga oficerët e policisë rrugore në zonën e Orvietos, në provincën e Terni, gjatë një kontrolli rutinë në autostradë. Automjeti tip Renault Megane u ndalua për verifikim, ndërsa dokumentacioni rezultoi i rregullt. Megjithatë, sjellja e tensionuar e drejtuesit të mjetit ngriti dyshime te efektivët.
Gjatë kontrollit fizik, policët konstatuan një fiksim të pazakontë të sediljes së pasagjerit me dyshemenë e makinës. Hetimi i mëtejshëm zbuloi saldime të dyshimta nën tapiceri, i cili çoi në zbulimin e një zgavre të fshehtë.
Sipas mediave italiane, ndarja sekrete aktivizohej përmes një sistemi elektromekanik të sofistikuar, i lidhur me panelin e instrumenteve dhe që funksiononte me një sekuencë të caktuar butonash. Pasi u hap dyshemeja e rreme, brenda saj u gjetën tetë pako me kokainë, me peshë totale mbi 9 kilogramë.
Me urdhër të Prokurorisë së Terni, 35-vjeçari u arrestua dhe u dërgua në burg, ndërsa droga dhe automjeti u sekuestruan si prova materiale.