FRANCË– Kilië Mbape është një armë që Madridit i duhet apriori nëse dëshiron të mundë Barcelonën në Sevilje këtë të shtunë. Kjo do të jetë finalja e katërt e francezit me “los blancos” dhe sigurisht që nuk ka bërë keq: ka fituar dy dhe ka humbur një, pikërisht kundër Barçës, por ka shënuar në të tria finalet.
Francezi debutoi si golashënues në një ndeshje zyrtare me Madridin gushtin e kaluar, në finalen e Superkupës së Evropës kundër Atalantës, duke shënuar golin e 2-0 në minutën e 83-të. Më pas erdhi titulli i dytë për me Madridin në finalen e Kupës Ndërkontinentale më 18 dhjetor, në të cilën ai hapi rezultatin në minutën e 37-të, teksa spanjollët përfunduan duke mposhtur Paçukën 3-0. Finalja e tretë do të vinte në janar të këtij viti dhe deri më tani është më e hidhura.
Sepse Reali u mund në finalen e luajtur në Arabinë Saudite me shifrat 2- 5 nga Barcelona. Kilië Mbape nuk mungoi në takimin e tij me golin. Në fakt ishte ai që shënoi golin e parë të ndeshjes, por më pas Barcelona do të përmbyste gjithçka. Kjo do të jetë finalja e tij e katërt dhe francezi shpreson të shënojë sërish. Dhe natyrisht shpreson që të jetë me një fund ndryshe nga ai i tre muajve më parë në Superkupën e Spanjës ndaj të njëjtit rival që do të përballet nesër në mbrëmje.
GOLAT – Mbapesë iu desh pak kohë për t’u shfaqur në Madrid. Ai luftoi për t’u përshtatur, pavarësisht atij goli në Superkupën e Evropës. Dhe më pas ai është në rrugën e tij për të mbyllur një sezon me ulje-ngritje. “Mbape është tashmë në nivelin e tij”, tha Ançeloti në fund të 2024. Dhe ai kishte të drejtë. Viti 2025 dukej si viti i ngritjes. Ai shënoi 12 gola në 12 ndeshje të ligës, duke shënuar një tregolësh kundër Sitit në “Bernabéu” në Ligën e Kampioneve, nata e tij më e mirë evropiane deri më tani./PanoramaSport