Presidenti francez Emmanuel Macron i dërgoi një mesazh të drejtpërdrejtë Kinës nga forumi i sigurisë Shangri-La në Singapor: nëse Pekini nuk frenon përfshirjen e Koresë së Veriut në luftën në Ukrainë, NATO mund të detyrohet të zgjerojë praninë e saj në Azi.
“Prania e Koresë së Veriut në Ukrainë është një çështje madhore. Nëse Kina nuk dëshiron përfshirjen e NATO-s në Azinë Juglindore, ajo duhet të ndalojë Phenianin të veprojë në tokën evropiane,” deklaroi Macron, duke sinjalizuar një ndryshim të mundshëm në qëndrimin tradicional të Francës kundër zgjerimit të NATO-s në rajonin aziatik.
Prej kohësh, Parisi ka kundërshtuar përfshirjen e Aleancës në rivalitetet strategjike të Azisë dhe madje bllokoi hapjen e një zyre të NATO-s në Japoni në vitin 2023. Por me raportimet për trupa koreano-veriore që mbështesin forcat ruse në frontin ukrainas — sidomos në rajonin e Kurskut — pozicioni i Francës duket se po evoluon.
Deklarata e Macron erdhi në fund të një turneu diplomatik në Azi, ku Franca nënshkroi disa marrëveshje, përfshirë në fushën e mbrojtjes, me vende si Vietnami dhe Indonezia. Turneu, që nisi me kritika të brendshme ndaj Macron, po mbyllet me një mesazh të fortë ndërkombëtar drejtuar Kinës dhe aleatëve të saj.