Një 15-vjeçar nga Gjirokastra është zhdukur prej më shumë se shtatë orësh, duke vënë në alarm familjarët dhe autoritetet. Lajmi është bërë publik nga familja e adoleshentit, e cila i është drejtuar mediave dhe qytetarëve për ndihmë, me shpresën që dikush mund të ketë informacion mbi vendndodhjen e tij.
I mituri quhet Mateo Kalemi, 15 vjeç. Ai është rreth 1.80 m i gjatë, ka sy bojëqielli dhe në momentin kur është parë për herë të fundit ishte i veshur me rroba të zeza dhe atlete ngjyrë gri.
Sipas dëshmive të familjarëve, Mateo është parë për herë të fundit rreth orës 12:30, pranë një agjencie në urën e lumit në Gjirokastër, ndërsa kërkonte të nisej drejt Tiranës. Për shkak se nuk kishte para për biletën, dyshohet se mund të ketë hipur në ndonjë mjet rastësor për të udhëtuar drejt kryeqytetit.
Familja e tij është tepër e shqetësuar dhe kërkon ndihmën e kujtdo që mund ta ketë parë. Policia ka nisur kërkimet dhe po kontrollon pamjet e kamerave të sigurisë për të përcaktuar drejtimin që ka marrë adoleshenti, por deri tani nuk ka asnjë gjurmë konkrete.
“Kushdo që mund të ketë informacion për Mateon, ju lutemi të kontaktojë menjëherë në numrat 0698178649 ose 0698571981. Çdo informacion, sado i vogël, është i rëndësishëm. Prindërit janë jashtëzakonisht të shqetësuar. Ju lutemi, ndihmoni.”