Skënder Cena, 74 vjeç, është kthyer në simbolin e këtij viti shkollor, duke u diplomuar si maturanti më i veçantë i Maturës Shtetërore 2025. Ai kaloi me sukses provimin e gjuhës angleze, për të cilin kishte parashikuar një notë kaluese, por në fund mori një rezultat edhe më të mirë – nota 7.
Rruga e tij drejt diplomës nuk ka qenë aspak e lehtë. Një aksident në rininë e tij, në hidrocentralin e Fierzës, i la pasoja në shikim dhe ndërpreu ëndrrën për shkollim. Vitet që pasuan u shoqëruan me vështirësi ekonomike, por dëshira për të mësuar nuk u shua kurrë.
Në moshën 64-vjeçare, ai u rikthye në bankat e shkollës profesionale në Kamëz, duke sfiduar barrierat e moshës. Megjithëse atëherë nuk arriti të kalojë provimet e maturës, këmbëngulja e tij e solli sot në finish me suksesin e shumëpritur.
Historia e Skënder Cenës është një shembull frymëzues i vendosmërisë dhe dashurisë për dijen, që nuk njeh moshë.