Nisma Thurje ka shpallur mbështetjen për kandidimin e Florian Binajt në zgjedhjet për kryetar të Bashkisë së Tiranës, duke theksuar se Tirana ka nevojë për një frymë të re dhe se Binaj përfaqëson këtë shpresë për qytetin dhe vendin.
Në reagimin e saj, Nisma Thurje vlerëson përkushtimin e Binajt si aktivist dhe gazetar, duke kujtuar pjesëmarrjen e tij në protestat për mbrojtjen e Teatrit Kombëtar dhe lumit Vjosa, si dhe angazhimin kundër padrejtësive sociale.
Partia shpreh bindjen se si kryetar bashkie, Binaj do të punojë për t’i dhënë shpresë Tiranës dhe gjithë Shqipërisë, duke synuar përmirësimin e shërbimeve publike dhe kthimin e qytetit në një vend që i shërben shumicës së qytetarëve, jo interesave të pakicës.
“Nisma Thurje mbështet Florian Binajn për kryetar bashkie. Sot, Kryesia e Nismës Thurje vendosi që në këto zgjedhje të mbështesim kandidatin e pavarur për Bashkinë e Tiranës, Florian Binaj. Ky vendim lidhet kryesisht mbi vlerat që Florian Binaj ka treguar në gjithë këto vite aktivizëm. Si aktivist, Flori ka treguar përkushtimin të jetë gjithmonë në anën e qytetarëve. Me të kemi protestuar përkrah në mbrojtje të Teatrit Kombëtar, në mbrojtje të lumit Vjosa, në protestat kundër rritjes së çmimeve apo shumë padrejtësive të tjera sociale. Si gazetar Flori ka treguar guximin për të denoncuar korrupsionin. Ai ka folur hapur, pa filtra. Në një qytet ku propaganda ka zëvendësuar të vërtetën, zëri i tij ka mbetur i pastër dhe pavarur. Tirana ka nevojë për një frymë të re, për njerëz që nuk janë pjesë e sistemit që e ka rrënuar. Prandaj, jemi të bindur si kryetar bashkie Flori do i japë shpresë Tiranës dhe gjithë Shqipërisë. Si këshilltarë bashkiak, do të ishte të punonim me kryetarin Florian Binajn për të siguruar ushqimin në shkolla, për transportin publik dhe për ta kthyer Tiranën në një qytet që i përket shumicës, jo interesave të pakicës”, thuhet në reagimin e Nismës Thurje.