Ndërsa numërimi i votave vijon ende në disa qytete dhe fitorja e Partisë Socialiste duket e pakontestueshme, kryeministri Edi Rama nuk është prononcuar ende publikisht për këtë sukses historik.
Sipas raportimit të gazetarit të Top Channel, Muhamed Veliu, nga selia e Partisë Socialiste, parashikohet që Rama të dalë me një prononcim të parë ditën e mërkurë.
“Nuk pritet një miting madhështor si ai në Sheshin Skënderbej pas zgjedhjeve të vitit 2021. Kësaj radhe, do të ketë një mesazh falënderimi nga Rama drejtuar qytetarëve për besimin e dhënë, që i jep PS-së mandatin e katërt për të qeverisur vendin,” raportoi Veliu.
Nuk është bërë ende e ditur nëse fjalimi do të jepet drejtpërdrejt nga selia e PS apo do të jetë një mesazh i regjistruar.
Ndërkohë, një foto e publikuar një ditë më parë – gjatë një telefonate të Ramës me Hashim Thaçin – tregonte fragmente të një fjalimi fitoreje të shkruar në kompjuterin e kryeministrit, ku theksohej kërkesa për një maxhorancë më të gjerë se 74 vota. Një objektiv që, sipas të dhënave të deritanishme, është arritur me sukses.
Në një intervistë për gazetën italiane Corriere della Sera, Rama ka dhënë komentet e para pas fitores, duke theksuar se rezultati erdhi si rrjedhojë e organizimit të fortë të PS-së dhe besimit të qytetarëve tek rruga drejt Bashkimit Evropian.
“Fitojmë sepse shqiptarët besojnë në drejtimin që kemi zgjedhur, jo sepse opozita humbet. Votuesit vlerësojnë rezultatet, jo retorikën pesimiste,” u shpreh Rama për median italiane.
Tashmë pritet vetëm fjala e tij zyrtare për ta vulosur këtë moment si fillimin e një kapitulli të ri në qeverisjen e vendit.