Shqipëria renditet mes tre vendeve më të pakënaqura në Europë për situatën financiare, krahas Bullgarisë dhe Turqisë, sipas të dhënave të Eurostat.
Në vitin 2022, qytetarët e BE-së e vlerësuan mesatarisht me 6.6 nga 10 gjendjen e tyre financiare, ndërsa kënaqësia me jetën në përgjithësi ishte më e lartë, në 7.1. Në krye të listës së vendeve më të kënaqura ishin Holanda dhe Finlanda (7.6), të ndjekura nga Suedia (7.4) dhe Austria (7.3).
Në anën tjetër, bullgarët (4.6), turqit (4.7) dhe shqiptarët (4.8) raportuan nivelet më të ulëta të kënaqësisë financiare, duke treguar se shumica ndihen më shumë të pakënaqur sesa të kënaqur me gjendjen e tyre ekonomike.
Nga viti 2013 deri në vitin 2022, kënaqësia financiare u rrit në shumicën e vendeve të BE-së, me përjashtim të Danimarkës, Luksemburgut dhe Suedisë ku pati rënie të lehtë, si dhe Francës e Finlandës ku mbeti e pandryshuar. Rritja më e fortë u shënua në Portugali (+1.4 pikë), Irlandë (+1.3), Qipro (+1.2) dhe Slloveni (+1.1).
Studimi tregon se diferencat më të mëdha në perceptimin financiar janë mes grupeve të ardhurave. Në Greqi, kënaqësia e shtresës më të pasur është më shumë se dyfishi i asaj të shtresës më të varfër, ndërsa në Bullgari dhe Kroaci është 75% më e lartë. Hendekët më të vegjël shënohen në Maltë, Itali dhe Finlandë.