Një operacion i gjerë ndërkombëtar i zhvilluar më 8 korrik 2025 në Itali, Spanjë dhe Shqipëri ka rezultuar në ndalimin e 28 personave të dyshuar për përfshirje në një rrjet të gjerë kriminal, me lidhje të drejtpërdrejta me organizatën famëkeqe italiane “Ndrangheta”. Aksioni u mbështet nga Europol dhe u koordinua nga autoritetet ligjzbatuese të të tre vendeve.
Mes të ndaluarve është edhe një shtetas italian nga Kalabria, i konsideruar si organizatori kryesor i një strukture që kontrollonte trafikun e kokainës në zonën e San Basilio, në periferi të Romës. Hetimet tregojnë se ai bashkëpunonte ngushtë me tre djemtë e tij dhe një grup shqiptarësh të përfshirë në logjistikën dhe shpërndarjen e drogës.
Rrjeti shqiptar dyshohet se kishte rol kyç në nxjerrjen e ngarkesave të drogës nga portet spanjolle dhe holandeze, duke siguruar më pas transportin e saj drejt Italisë. Ata ishin gjithashtu të përfshirë në shpërndarjen e lëndëve narkotike në zona të ndryshme të kryeqytetit italian. Sipas hetuesve, kokaina vinte nga Amerika e Jugut dhe përmes porteve të ndryshme në Evropë, përfundonte në tregun italian, përfshirë dhe portin e Gioia Tauro.
Dhuna dhe frika, metoda të kontrollit brenda organizatës
Autoritetet italiane zbuluan edhe raste të përdorimit të torturës si formë presioni dhe frikësimi ndaj anëtarëve të rrjetit. Katër persona dyshohet se kanë rrëmbyer dhe keqtrajtuar rëndë një trafikant droge. Akti brutal është filmuar me celular dhe videoja është shpërndarë brenda organizatës, për të mbjellë frikë dhe për të siguruar bindje absolute ndaj udhëheqësve të grupit.
Hetimi zbuloi gjithashtu përdorimin e sistemeve të koduara komunikimi nga grupi kriminal, të cilat shpërndaheshin nga një ofrues shqiptar i shërbimeve të krimit kibernetik, që u arrestua gjithashtu gjatë operacionit.