Një shqiptar i shpallur në kërkim ndërkombëtar është arrestuar në Itali gjatë një operacioni hetimor të Njësisë së Policisë Ekonomike dhe Financiare të Leçes (GICO).
I arrestuari është Platin Velaj, 41 vjeç, i cili u lokalizua dhe u vu në pranga në qytetin Fasano. Pas ndalimit, autoritetet italiane i komunikuan atij një urdhër arresti të përkohshëm me qëllim ekstradimin në Shqipëri.
Velaj ishte në kërkim bazuar në një urdhër arresti të lëshuar më 10 mars 2022 nga Gjykata Penale e Lushnjës. Ai është i dënuar me dy vite burg për veprën penale të posedimit pa leje të armëve dhe eksplozivëve, krim i kryer në dhjetor të vitit 2015 brenda një lokali.
Gjatë kontrollit të banesës ku qëndronte, policia zbuloi një pistoletë të kalibrit 7.65 me numër serial të fshirë, një karikator me katër fishekë, si dhe dokumente identifikimi të rreme, të cilat dyshohet se i kishte përdorur për t’u fshehur gjatë periudhës së arratisjes.
41-vjeçari u referua gjithashtu në Prokurorinë Publike të Brindizit, që ka juridiksion territorial, për posedim të paligjshëm të armëve dhe municioneve në Itali, ndërsa u transferua në burgun e Brindizit.
Ndërkohë, autoritetet po hetojnë edhe përgjegjësinë penale të një bashkëkombësi të tij, i cili dyshohet se i ka ofruar strehim të kërkuarit në banesën e tij.