Ka përfunduar arratia e një të kërkuari nga policia e Kosovës, i akuzuar për vrasje. Xhemajl Nuhiu, 47 vjeç, u arrestua nga skuadra e gjurmimit të të kërkuarve në Policinë Metropolitane të Londrës dhe përpara tij ka nisur procesi i ekstradimit.
Nuhiu ishte shpallur në kërkim nga autoritetet kosovare, pasi akuzohet se më 11 gusht 2025 kreu vrasjen e Muhamet Matoshit. Sipas raportimeve të mediave kosovare, njësia e Hetimeve të Përgjithshme në Prishtinë kishte kërkuar ndihmën e qytetarëve për të ndihmuar në gjetjen e të dyshuarit, i cili ndodhej në arrati që nga momenti i krimit.
Xhemajl Nuhiu do të paraqitet përsëri para gjykatës së ekstradimeve në Londër më 31 tetor 2025, në orën 11:45. Ai aktualisht qëndron në paraburgim në kryeqytetin britanik.
Rrethanat e arratisjes së tij nga Kosova drejt Britanisë së Madhe mbeten ende të paqarta.