Policia greke ende nuk ka dhënë një deklaratë zyrtare për operacionin e fundit që çoi në arrestimin e gjashtë personave të dyshuar për tentativën e vrasjes së mafiozit grek Jani Lala. Megjithatë, mediat greke kanë publikuar detaje të reja mbi këtë aksion.
Në pranga ka rënë 45-vjeçari nga Labova e Poshtme e Gjirokastrës, Dhimiter Meci, i njohur si “Dhimo”, i konsideruar prej kohësh në Greqi si një vrasës me pagesë. Ai është arrestuar disa herë ndër vite për ngjarje të ndryshme kriminale dhe shpesh është liruar në rrethana të paqarta.
Meci u kap gjatë një operacioni të shërbimit të posaçëm të policisë greke, së bashku me pesë persona të tjerë: tre shqiptarë dhe dy grekë, mes tyre një grua. Ata akuzohen për ngjarjen e 16 majit 2025, kur nga një motor u qëllua me rreth 40 plumba drejt automjetit të blinduar “Mercedes-Benz” të 41-vjeçarit Jani Lala në zonën e Ano Liosia në Athinë. Lala ia doli të shpëtonte falë blindimit të makinës.
Lala, një emër i njohur në rrethet e krimit në Greqi, kishte qenë i arrestuar më herët për vrasjen e gazetarit Jorgo Karaivaz dhe të boksierit Hari Kontogiorgi, por ishte liruar. Ai konsiderohej së fundmi njeriu i afërt i kriminelit të njohur ukrainas “Etnik”, që jeton në Dubai. Vetë Lala është gjetur i vrarë një muaj më parë në Arahova, ngjarje që tashmë është zbardhur nga policia greke.
Gjatë operacionit të sotëm, policia sekuestroi 4 armë automatike Kallashnikov, 3 pistoleta, dhjetëra fishekë dhe sasi kokaine.
Kush është Dhimo Meci
Dhimo Meci, 45 vjeç, rezulton i dënuar disa herë në Greqi për vjedhje, grabitje, tentativë vrasje, vrasje dhe pjesëmarrje në organizata kriminale.
Arrestimi i parë i tij daton në vitin 2004, për vrasjen e një emigranti sirian pranë një qendre prostitucioni në Athinë.
Gjatë një leje 9-ditore nga burgu i Kasandrës, ai u përfshi në grabitjen e një agjencie Pro-Po në Glifadha, duke marrë 65 mijë euro.
Më pas, ai është arrestuar disa herë për shkelje të lirimit me kusht dhe për një sërë veprash të tjera penale.
Pas vitit 2011, Meci dyshohet se ka punuar për një bandë që merrej me gjobëvënie në disa zona të Athinës, ku bizneset paguanin 100–150 euro çdo dy javë për “mbrojtje”. Ai përmendet si i dyshuar për disa vrasje të ndodhura midis viteve 2006–2014, të lidhura me larje hesapesh mes grupeve të krimit të organizuar.
Sipas mediave greke, pas disa prej këtyre vrasjeve ai ishte zhdukur për një periudhë kohe në Shqipëri dhe dyshohej se paguhej deri në 200 mijë euro për ekzekutime. Në dhjetor 2014 u arrestua në Sepolia së bashku me Klodian Lekocajn (Klod Cara), i identifikuar si drejtues i një bande kriminale të përfshirë në vrasje me pagesë. Meci u kap me dy pistoleta dhe dyshohej për përfshirje në një tjetër tentativë vrasjeje në Halkidiki në verën e vitit 2014.
Në vitin 2018, ndërsa vuante dënimin në burgun e Koridhalos, policia e lidhi me vrasjen e Artin Katos, ndodhur në vitin 2012 në Peristeri. Kato jetonte në Holandë dhe ishte thirrur në një takim kurth, pasi Meci komunikonte me të përmes një profili të rremë në Facebook, të emërtuar “Anastasia”.
Megjithëse i akuzuar për një sërë veprash të rënda, ende nuk dihet se si Meci ka arritur të fitojë lirinë në periudha të ndryshme gjatë viteve.