Gjykata e Posaçme kundër Korrupsionit dhe Krimit të Organizuar ka shpallur fajtorë dhe ka dënuar shtatë anëtarë të një grupi të strukturuar kriminal, të përfshirë në trafikimin e emigrantëve të paligjshëm nga Shqipëria, përmes Kosovës, drejt vendeve të Bashkimit Europian.
Të pandehurit u gjykuan me procedurë të zakonshme dhe u gjetën fajtorë për disa vepra të rënda penale, përfshirë tentativë për vrasjen e punonjësve të Policisë së Shtetit gjatë një operacioni në Morinë në vitin 2023. Sipas dosjes, gjatë ndërhyrjes së policisë ata kanë qëlluar me armë zjarri ndaj efektivëve në krye të detyrës, në përpjekje për t’u arratisur.
Dënimet më të rënda
Tre prej të pandehurve, Sultan Grimash (alias Sadaak Guremache alias Junes Alma), Ayoub Bahhoo, Muhammed Radën (alias Muhamed Radouë alias Radvan Radvan) si dhe Muhammed Shehab (alias Mohamed Al Uthman Shaab alias Mohamed Outman), u dënuan me nga 35 vite burgim secili, pas bashkimit të dënimeve për disa akuza, ku përfshihen:
“Vrasja e punonjësve të Policisë së Shtetit”, mbetur në tentativë
“Vrasja me dashje”, mbetur në tentativë
“Ndihma për kalim të paligjshëm të kufijve”
“Trafikimi i armëve dhe i municionit”
“Grupi i strukturuar kriminal”
Gjykata vendosi që dënimet të vuhet në burg të sigurisë së lartë.
Dënime të tjera
Rabi Lqadi (alias Rabi El-Kadi) u dënua me 8 vite burgim.
Muhammed Nasir (alias Nouh Graie) u dënua me 12 vite burgim.
Nagid Alabdalah (alias Abu Gira) u dënua me 8 vite burgim.
Disa prej të pandehurve u shpallën të pafajshëm për akuzën e “kalimit të paligjshëm të kufirit shtetëror”, pasi gjykata vlerësoi se fakti nuk përbën vepër penale.
Vendimi u shpall nga trupi gjykues i përbërë nga gjyqtarët Elsa Ulliri, Etleva Deda dhe Bib Ndreca, me vendimin nr. 12, datë 10.02.2026, pas pretencës së paraqitur nga SPAK.
Ngjarja daton në vitin 2023, kur gjatë një operacioni në pikën kufitare të Morinës, anëtarët e grupit hapën zjarr ndaj forcave të policisë, duke rrezikuar jetën e disa efektivëve.