Pas 40 ditësh në qeli, Alti Nallbati, vëllai i deputetit demokrat Bledjon Nallbati, së bashku me Marsel Buçi dhe Trajan Çeliku, janë liruar nga burgu i Drenovës, pasi gjykata vendosi ndryshimin e masës së sigurisë në “arrest shtëpie”.
Tre të arrestuarit ishin vendosur fillimisht në burg për shkak të nevojës për mbledhjen e provave dhe veprimeve hetimore shtesë nga prokuroria. Ata akuzohen se morën peng dhe dhunuan 32-vjeçarin Ilir Topçiu në qytetin e Bilishtit, duke e çuar në një magazinë në pronësi të njërit prej tyre, ku e mbajtën disa orë dhe e dhunuan.
Ngjarja tronditi opinionin publik dhe pas saj u shkarkua drejtori i policisë së qarkut, Erion Ahmeti, ndërsa u pezullua zëvendësdrejtori për hetimin e krimit në DVP Korçë, Hajri Kushe.
Alti Nallbati dhe Trajan Çeliku akuzohen për “heqje të paligjshme të lirisë” dhe “kanosje”, të dyja të kryera në bashkëpunim. Marsel Buçi, përveç dy veprave të mësipërme, akuzohet edhe për “plagosje të lehtë me dashje”. Hetimet për ngjarjen vijojnë që nga momenti i denoncimit të saj pranë policisë nga viktima Ilir Topçiu.