Ekspozimi më i madh ndaj dritës natyrale mund të përmirësojë kontrollin e sheqerit në gjak, veçanërisht te personat me diabet të tipit 2, shkruan salute.eu, duke iu referuar një studimi të publikuar në revistën shkencore Cell Metabolism.
Edhe pse njerëzit kalojnë rreth 90% të kohës së tyre brenda ambienteve të mbyllura, drita natyrale luan një rol kyç në sinkronizimin e ritmeve biologjike të trupit. Kur ky sinjal dobësohet, krijohet një lloj çrregullimi, ku truri dhe organet periferike, përfshirë muskujt, nuk funksionojnë më në harmoni optimale.
Studimi përfshiu 13 persona mbi moshën 65 vjeç, të gjithë të diagnostikuar me diabet të tipit 2, të cilët u monitoruan në kushte shumë të kontrolluara. Pjesëmarrësit iu nënshtruan dy seancave të ndryshme, të ndara nga të paktën katër javë dhe të renditura në mënyrë të rastësishme.
Në njërën seancë, ata qëndruan nga ora 08:00 deri në 17:00 në një ambient me dritare të mëdha dhe dritë natyrale. Në seancën tjetër, ndoqën të njëjtën rutinë ditore, por nën ndriçim artificial të vazhdueshëm. Ushqimi, aktiviteti fizik, gjumi dhe koha para ekraneve u mbajtën sa më identike që të ishte e mundur.
Rezultatet treguan se gjatë ekspozimit ndaj dritës natyrale, pjesëmarrësit kaluan rreth 59% të kohës brenda diapazonit optimal të sheqerit në gjak, krahasuar me 51% gjatë ndriçimit artificial. Po ashtu, u vu re një ulje e luhatjeve të glicemisë.
Në të njëjtën kohë, studiuesit konstatuan një rritje të oksidimit të yndyrës, çka sugjeron përmirësim të fleksibilitetit metabolik, si dhe nivele pak më të larta të melatoninës në mbrëmje, një tregues i një ritmi biologjik më të mirëorganizuar.
Sipas autorëve, gjetjet nënvizojnë rëndësinë e dritës natyrale si një faktor i thjeshtë, por potencialisht i rëndësishëm, në menaxhimin e metabolizmit dhe të diabetit.