Eksperti i ekonomisë Erald Pashaj ka komentuar në “Pjaca në Radar” mbi ndryshimet sociale dhe ekonomike në Shqipëri, duke u ndalur te raporti i shoqërisë me paranë dhe perceptimi për arsimin.
Sipas tij, “miti i diplomës ende nuk ka rënë”, ndërsa “miti i parasë është i qartë për të gjithë shqiptarët”, duke shtuar se fitimi i parave është kthyer në fokusin kryesor të një pjese të madhe të popullsisë.
Pashaj thekson se paraja sjell si pasoja pozitive ashtu edhe negative, ndërsa shoqëria shqiptare, sipas tij, ka kaluar një transformim të dukshëm në dekadat e fundit.
“Shqipëria nuk është më një vend i varfër si më parë, ka një përmirësim të ndjeshëm ekonomik. Ka ende njerëz në vështirësi, por nga ana tjetër ka edhe individë me shumë pasuri,” u shpreh ai.
Megjithatë, ai ngriti shqetësimin se një pjesë e pasurisë është përqendruar në “duar të gabuara”, duke iu referuar individëve që, sipas tij, janë përfshirë në aktivitete të paligjshme apo kriminale.
“Paraja ka rënë edhe në duar të njerëzve që kanë bërë aktivitete të paligjshme, deri kriminale. Kjo lidhet edhe me tranzicionin e vështirë që ka kaluar vendi,” shtoi Pashaj.