Ekspertët amerikanë kanë përditësuar sërish rekomandimet për depistimin e kancerit të gjirit me mamografi, ndërsa diskutimet mbi moshën e duhur për nisjen e kontrolleve dhe shpeshtësinë e tyre vijojnë të mbeten të hapura në komunitetin mjekësor.
Sipas udhëzimeve më të reja të publikuara nga Kolegji Amerikan i Mjekëve (ACP) në revistën shkencore “Annals of Internal Medicine”, gratë pa simptoma dhe me rrezik mesatar për zhvillimin e kancerit të gjirit duhet t’i nënshtrohen mamografisë një herë në dy vjet, nga mosha 50 deri në 74 vjeç.
Për gratë e grupmoshës 40-49 vjeç, ekspertët sugjerojnë që vendimi për kryerjen e mamografisë të merret në mënyrë individuale, në konsultim me mjekun specialist dhe pas vlerësimit të faktorëve personalë të rrezikut.
Rekomandimet janë hartuar nga një grup studiuesish të drejtuar nga Dr. Amir Qaseem, në bashkëpunim me ekspertë të Shkollës së Shëndetit Publik të Universitetit Brown dhe Shkollës së Mjekësisë “David Geffen” në Universitetin e Kalifornisë, Los Anxheles.
Në përditësimin e tyre, autorët analizuan të dhëna shkencore dhe udhëzime nga organizata të ndryshme ndërkombëtare për të vlerësuar përfitimet dhe rreziqet e depistimit të hershëm.
Sipas tyre, mamografitë e shpeshta tek gratë më të reja mund të rrisin mundësinë e rezultateve false pozitive, të shkaktojnë ankth psikologjik, të çojnë në biopsi të panevojshme dhe në raste të mbi-diagnostikimit. Për këtë arsye, ACP mbështet një qasje më të personalizuar për gratë nën moshën 50 vjeç.
Megjithatë, rekomandimet nuk janë të njëjta në të gjitha organizatat mjekësore. Task Forca Amerikane për Shërbimet Parandaluese rekomandon mamografi çdo dy vjet duke filluar nga mosha 40 vjeç, ndërsa Shoqata Amerikane e Kirurgëve të Gjirit mbështet kryerjen e mamografisë çdo vit që nga kjo moshë.
Ekspertët theksojnë se faktorë si historia familjare e sëmundjes, mutacionet gjenetike BRCA, dendësia e lartë e indit të gjirit, ekspozimi i mëparshëm ndaj rrezatimit dhe elementë të tjerë individualë duhet të merren parasysh në përcaktimin e kohës dhe frekuencës së depistimit.
Rekomandimet e reja publikohen në një kohë kur kanceri i gjirit mbetet ndër format më të përhapura të kancerit tek gratë në mbarë botën, duke nxitur përpjekjet për të gjetur ekuilibrin mes zbulimit të hershëm të sëmundjes dhe shmangies së procedurave të panevojshme diagnostikuese.