Vrasja mafioze e biznesmenit Edmond Papa në dhjetor 2022 rezulton të ketë qenë një akt i pastër hakmarrjeje për ekzekutimin e Aleksandër Sadikajt, i njohur si “Sanço”. Hetimet e Prokurorisë kanë zbuluar se pak javë para atentatit, i dyshuari kryesor, Andrew (Edvin) Bode, lidhi një pakt vëllazërie me gjak me Adriatik Kalemin, kushëririn e Sadikajt, në një ritual simbolik të regjistruar në video.
Në dosjen hetimore, zbulohet se Bode dhe bashkëpunëtori i tij Albano Velo, që luajti rolin e vëzhguesit, kanë ndjekur dhe përgjuar lëvizjet e Papës për ditë me radhë, duke përdorur makina me qira dhe targa të ndryshuara. Gjatë kontrollit të celularit të Velos, janë gjetur foto me Bode-n dhe një imazh i vetë viktimës, që i ka “tradhtuar” për hetuesit njohjen dhe përgatitjet për atentatin.
Në një video tjetër të datës 13 nëntor 2022, vetëm pak javë para vrasjes, Bode dhe Kalemi shfaqen me një armë zjarri në dorë. Ndërsa në një tjetër, më 27 nëntor, shihen teksa pijnë gjakun e njëri-tjetrit si shenjë vëllazërimi – një akt me ngjyrim ritual dhe besnikëri.
Vrasja e Edmond Papës, e ndodhur në mes të ditës në një lokal në zonën e Selitës në Tiranë, tronditi opinionin publik. Papa ishte i njohur për lidhjet e tij me trafikun e drogës në disa vende europiane, dhe dyshohet gjithashtu për përfshirje në skema pastrimi parash.
Ndërkohë që Velo ndodhet tashmë në pranga, Bode është ende në kërkim. Policia ka zgjeruar hetimet edhe ndaj babait të Velos, një ish-punonjës policie, i shkarkuar pas përfshirjes së të birit në këtë ngjarje të rëndë.