Forca e Sigurisë së Kosovës (FSK) ka nisur një operacion kërkim-shpëtimi në zonën e “Qafës së Burrelit”, në bashkinë Klos, pas një rrëshqitjeje masive dheu që zuri poshtë një 29-vjeçar.
Me kërkesë të autoriteteve shqiptare, një ekip i specializuar i FSK-së është dislokuar në vendin e ngjarjes për të ndihmuar në kërkimin e Ardit Beshirit, i cili u zë nga masivi i dheut ndërsa punonte me fadromë për sistemimin e mineralit të kromit në një fabrikë pasurimi të menaxhuar nga një kompani kineze.
Sipas njoftimit zyrtar, ekipet e kërkim-shpëtimit janë duke përdorur personel të trajnuar, pajisje të specializuara dhe qen kërkimi (K9), në bashkëpunim të ngushtë me autoritetet shqiptare, për të lokalizuar trupin e të riut.
Ngjarja ndodhi të shtunën, ndërsa kërkimet vijojnë prej tre ditësh pa rezultat, për shkak të vështirësive të shkaktuara nga sasia e madhe e materialeve inerte që mbulojnë zonën.