Mungesa e ujit të pijshëm ka detyruar banorët e Hoxharës së re, në Fier të ngrihen në protestë gjatë ditës së sotme.
Banorët pohojnë se përgjatë gjithë muajve të verës në çesmat e tyre ka patur vetëm 30 minuta ujë në ditë, situatë kjo e papranueshme në këto temperatura përvëluese.
Qytetarët shprehen se ujësjellësi në Fier është bërë si mafie, punësohen njerëz dhe në fund askush nuk vjen për të zgjidhur një problem.
“Më është djegur bolieri nga uji i papastër, jam detyruar të paguaj 80 euro”, shprehet një qytetare. Ndërkohë një tjetër shprehet se ujit i vjen era fekale, pasi ka përzierje të ujrave të zeza me ato të tubacioneve të pastra.
“Edhe 30 minuta që vjen uji është i ndotur. Tani kanë lëshuar ujin në kanal, mbushim ujin këtu dhe e çojmë në shtëpi që lahemi”, thotë një tjetër qytetar.
Ata pohojnë gjithashtu se situate përsëritet teksa theksojnë se për nevojat e tyre kanë marrë ujë nga kanali vaditës që përshkon zonën.
Mungesa e këtij elementi jetik thonë banorët është absurde pasi ata shrehen se kanë qenë taksapagues të rregullt ndonëse furnizohen vetëm gjysëm ore ujë në ditë.
Përballë kësaj situate ata i kanë bërë thirrje njëzëri institucioneve përgjegjëse të marrin masa të menjëhershe, pasi në të kundërt do të përshkallëzojnë protestat.