Këngëtari nga Peja, Gjesti, është rikthyer në skenën muzikore dhe në rrjete sociale pas një periudhe të gjatë mungese, duke ndarë me ndjekësit një mesazh të ndjerë dhe shpresëdhënës.
Në një postim në profilin e tij, ai ka publikuar një fotografi, ku shfaqet i qetë dhe i reflektuar, duke njoftuar nisjen e një kapitulli të ri në jetën e tij. “Kapitull i ri. Ju dua ♥️”, ka shkruar Gjesti krahas fotos.
Rikthimi i tij vjen pas një tragjedie familjare që e mbajti larg vëmendjes publike. Vëllai i tij, Eldioni, ndërroi jetë në moshën 15-vjeçare si pasojë e një aksidenti me motoçikletë.
Këngëtari zgjodhi që kthimin në muzikë ta bëjë me një dedikim prekës për vëllain e ndjerë. Kënga “Memories” pasqyron dhimbjen, mallin dhe emocionet e forta që ka përjetuar gjatë kësaj periudhe të vështirë.
Në postimin ku njoftoi publikimin e këngës, Gjesti shkruante:
“Muzika më ka ndenjur gjithmonë afër, si në gëzim, si në hidhërim. ‘Memories’ është një këngë që e kam shkruar me lot dhe e kam pasur shumë të vështirë ta incizoj. Jam munduar ta kursej familjen time, mos t’i mërzis shumë. E në krejt këtë mërzi, po mundohem të gjej lumturi dhe të kthehem në muzikë afër jush.”
Teksti dhe vija melodike mbajnë qartë prekjen personale të artistit. Në vargjet e këngës, Gjesti i drejtohet vëllait duke shprehur se i kanë mbetur shumë gjëra pa i thënë, ndërsa kujtimet për të mbeten të pashlyeshme.
Ai flet hapur për dhimbjen e humbjes, duke pranuar se ka pasur momente kur i ka munguar motivimi për të vazhduar përpara, ndërsa rikujton kohën e kaluar bashkë – momente që sot mbeten vetëm kujtime. “E kuptova kur ike sa shumë të desha”, shprehet këngëtari në këngë.