Një operacion i Policisë së Fierit ka çuar në zbulimin e një baze kriminale me arsenal armësh dhe municioni në lagjen “Kastriot”.
Pas informacioneve të siguruara nga gazetarët e emisionit investigativ “Piranjat”, policia ka ndaluar një 38-vjeçar me iniciale M. R., i cili u kap në flagrancë me një pistoletë pa leje dhe 3,500 euro në automjetin e tij.
Hetimet e mëtejshme çuan në zbulimin e një banese të pabanuar që 38-vjeçari e përdorte si bazë për ruajtjen dhe modifikimin e armëve, që dyshohet se ishin destinuar për shitje te grupe kriminale.
Gjatë kontrollit në ambient u sekuestruan:
10 automatikë, tre prej tyre të modifikuar me shënjestër optike dhe vend filetimi për silenciator;
2 pistoleta, njëra automatike;
2 silenciatorë;
12 karikatorë dhe disa krehra pistolete;
Sasi të mëdha municioni të kalibrave të ndryshëm.
Në përfundim të veprimeve, M. R. u arrestua në flagrancë, ndërsa hetimet vijojnë në bashkëpunim me Prokurorinë e Fierit për të identifikuar personat e tjerë të përfshirë në këtë aktivitet të paligjshëm.
Autoritetet e konsiderojnë këtë goditje si një nga operacionet më të rëndësishme të muajve të fundit kundër trafikut të armëve në jug të vendit.