Partia Demokratike e Kosovës ka kërkuar rivotim të menjëhershëm në Mitrovicë, pas dyshimeve për cënimin e procesit zgjedhor në këtë komunë. Më parë, PDK kishte apeluar për një hetim të procesit, por tani kërkon ndërhyrje të menjëhershme.
Deputeti i PDK-së, Përparim Gruda, ka bërë me dije se gjatë numërimit të votave, komisionerët e partisë kanë vënë re parregullsi me numrat serialë të disa fletëvotimeve. Ai theksoi se çdo fletë ka një kod identifikues që duhet të sigurojë që votat të mos transferohen nga një qendër në tjetrën, gjë që sipas tij nuk ka ndodhur në këtë rast.
Ndërkohë, ligjvënësi i PDK-së, Artan Behrami, e ka akuzuar kryeministrin Albin Kurti për “fabrikim shtetëror të rezultatit zgjedhor”. Behrami tha se në pesë vitet e fundit, Kurti ka pezulluar logjikën dhe ka përhapur inat dhe përçarje në shoqëri, duke reflektuar këtë edhe në zgjedhjet lokale.
“Kurti ka shfrytëzuar potencialin shtetëror, grupe të nëndheshme dhe banda kriminale për të fabrikuar një fitore, që mund të shndërrohet në skandalin më të madh zgjedhor në historinë e Kosovës së pasluftës”, deklaroi Behrami. Ai shtoi se gjatë procesit të numërimit janë vënë re elemente manipulimi, që sipas tij dëshmojnë për një “tren qeveritar, e jo tren bullgar”.