Dy persona janë plagosur nga të shtënat me armë zjarri pranë një xhamie në qytetin suedez të Örebros. Policia ka konfirmuar se ngjarja po hetohet si tentativë vrasjeje, ndërsa viktimat janë dërguar menjëherë në spital. Nuk janë dhënë detaje mbi gjendjen e tyre shëndetësore.
Sipas transmetuesit publik SVT, një dëshmitar okular ka treguar se një prej personave u qëllua menjëherë pasi kishte dalë nga xhamia pas lutjeve të së premtes. Autoritetet nuk kanë sqaruar ende nëse sulmi kishte në shënjestër vetë xhaminë apo individë të caktuar.
Autori i krimit është ende në kërkim. Shërbimet e emergjencës dhe forca të shumta policie ndodhen në vendngjarje, ndërsa publikut i është kërkuar të shmangë zonën.
Ngjarja vjen vetëm pak muaj pas një tjetër tragjedie në Örebro, ku në shkurt, dhjetë studentë dhe mësues u vranë në një sulm me armë zjarri – ngjarja më vdekjeprurëse e këtij lloji në historinë moderne të Suedisë.