Kreu i Prokurorisë së Posaçme (SPAK), Altin Dumani, ka deklaruar se ish-zv.kryeministri Arben Ahmetaj është “i mirëpritur të bashkëpunojë me drejtësinë”, nëse dëshiron ta bëjë një gjë të tillë.
Gjatë raportimit të tij në Kuvend, në përgjigje të pyetjeve të deputetes së PD-së Jorida Tabaku, Dumani foli për ecurinë e hetimeve mbi çështjen e inceneratorëve në Elbasan, Fier dhe Tiranë.
“SPAK ka hetuar në kuadër të këtyre procedimeve penale 71 persona të të gjitha niveleve. Disa prej tyre janë dënuar me vendim të formës së prerë, disa janë në gjykim dhe disa të tjerë në hetim,” – tha Dumani.
Ai shtoi se për inceneratorët e Fierit dhe Elbasanit, gjykatat kanë konfirmuar vlefshmërinë e kualifikimit ligjor të bërë nga SPAK.
Sa i përket Arben Ahmetajt, Dumani nënvizoi:
“Sot ai është person në kërkim ndërkombëtar për disa vepra penale. Në çdo moment që dëshiron të bëhet bashkëpunëtor i drejtësisë, është mëse i mirëpritur.”