Sulme intensive me dronë dhe raketa nga Rusia kanë shkaktuar dëme të shumta gjatë natës në disa rajone të Ukrainës, duke goditur ndërtesa banimi dhe infrastrukturë civile, përfshirë edhe një central energjie diellore në Odesë.
Forca Ajrore ukrainase njoftoi se Rusia përdori një raketë “Iskander” dhe plot 176 dronë, nga të cilët 139 u rrëzuan ose u çaktivizuan falë ndërhyrjes elektronike.
Rajoni verilindor i Sumit ishte ndër më të goditurit. Një grua 86-vjeçare mbeti e plagosur, ndërsa infrastruktura civile pësoi dëme të konsiderueshme. Sirenat e alarmit u aktivizuan për 18 orë gjatë 24 orëve të fundit.
Në jug, rajoni i Odesës u sulmua sërish me objektiv infrastrukturën energjetike. Guvernatori Oleh Kiper konfirmoi se një central diellor u dëmtua rëndë. Pamjet e publikuara tregojnë panele të rrëzuara, të thyer dhe të shpuara nga predhat.
Që prej fillimit të luftës në shkurt 2022, Rusia ka goditur vazhdimisht infrastrukturën civile të Ukrainës. Moska pretendon se energjia e prodhuar nga këto centrale përdoret nga industria ushtarake ukrainase, një justifikim që Kievi e ka hedhur poshtë me forcë.
Ndërkohë, miliona ukrainas përballen me ndërprerje të shpeshta të energjisë, si dhe probleme me furnizimin me ujë dhe ngrohje, për shkak të dëmtimeve të vazhdueshme të rrjetit energjetik.