Një ngjarje alarmante ka tronditur Arezzo-n në Itali, ku një fëmijë 4-vjeçar u dërgua me urgjencë në spital pas konsumimit të biskotave të përgatitura me kanabis. Biskotat ishin pjekur nga xhaxhai i tij, i cili nuk kishte informuar familjarët për përbërësit narkotikë.
I mituri humbi ndjenjat dhe shfaqi simptoma të rënda pas konsumimit të disa biskotave të gjetura në qilarin e shtëpisë së gjyshërve. Nëna e tij i tha mjekëve se djali kishte ngrënë disa prej tyre gjatë vizitës, pa e ditur origjinën dhe përmbajtjen.
Analizat spitalore zbuluan nivele shumë të larta të kanabisit si në gjak, ashtu edhe në urinë. Mjekët njoftuan menjëherë autoritetet, të cilat ndërhynë në banesën e xhaxhait.
Gjatë kontrollit në pronë, policia zbuloi një serë profesionale për kultivimin e kanabisit, të pajisur me llamba, ventilatorë dhe sisteme të tjera të specializuara. Në një kasolle pas shtëpisë u gjetën rreth 600 gramë marihuanë e tharë, ndërsa në frigorifer u sekuestruan 20 biskota të përgatitura me kanabis, me peshë rreth 500 gramë.
Burri, i cili nuk kishte precedent penal, por ishte i njohur për përdorim droge, u arrestua në flagrancë. Ai përballet me akuza për: kultivim dhe prodhim të lëndëve narkotike, posedim droge, si dhe “lëndim të pakujdesshëm” ndaj të miturit.
Gjatë seancës së parë gjyqësore të zhvilluar të martën, gjykata konfirmoi arrestimin e tij, ndërsa procesi u shty për një datë tjetër.
Sipas raportimeve të Corriere Fiorentino, fëmija tashmë ndodhet jashtë rrezikut për jetën dhe gjendja e tij shëndetësore është stabilizuar.