Vijon në Gjykatën e Posaçme procesi gjyqësor i dosjes së njohur si “Plumbi i Artë”, ku dëshmitarja A. Haxhia dha sot rrëfimin e saj për grabitjen e dhunshme që ka përjetuar.
“Ato 15 minuta më janë dukur si 15 vjet”, deklaroi ajo në sallë, duke përshkruar momentet kur dy persona të maskuar hynë me forcë në banesë. Sipas dëshmisë, autorët mbanin kapuçë dhe doreza, ndërsa njëri prej tyre ishte i armatosur me pistoletë.
Haxhia tregoi se gjithçka nisi me një zhurmë të fortë, kur dera u shpërthye dhe autorët u futën brenda duke u prezantuar si “antidroga” dhe duke pretenduar se në banesë kishte drogë.
Sipas dëshmisë, njëri prej të maskuarve i mori telefonin nga dora, ndërsa të dy e kërcënuan rëndë: “Mos lëviz, se të vras djalin”. Ajo tha se ishte detyruar të mbulohej dhe të mbronte fëmijën, teksa autorët kontrollonin çdo dhomë.
Nga banesa, sipas saj, u grabitën paratë e kursyera – rreth 2 mijë euro –, si dhe bizhuteri të ndryshme, përfshirë orën dhe unazat. Në dhomën tjetër ndodhej vjehrra me fëmijën e vogël, e cila gjithashtu ishte dhunuar dhe mbyllur në banjë. Vjehrra, tregoi dëshmitarja, kishte arritur madje ta godiste me shapkë njërin prej grabitësve.
Pas largimit të autorëve, Haxhia njoftoi motrën, duke pohuar se nuk kishte as 200 lekë për t’u blerë bukë fëmijëve: “I thashë, hajde na sill lekë, se nuk kam asgjë”.
Procesi në SPAK vijon, ndërsa dëshmitë e viktimave janë pjesë e provave kyçe në çështjen e “Plumbit të Artë”.