Big Basta rikthehet fuqishëm në skenën muzikore shqiptare. Pas një shkëputje disa vjeçare dhe jetës në Australi me djalin dhe Vesa Lumën.
“Më kishte marrë malli shumë. E shoh si një mundësi që të prek zemrat e të rinjve, të cilët janë rritur shumë. E kam dëshirë dhe pasion, por dua dhe të shoh reagimet e brezit të ri kundrejt punës sime”, tha ai duke folur për Top Albania Radio.
Ç’mund të na thuash për albumin e ri?
Pas atyre pushimeve të shkurtra, kam qenë në një punë intensive sepse po përgatis një EP me 6 këngë dhe më duhet ta promovoj deri në fund të tetorit, të paktën. Për sa i përket detajeve, albumi do të titullohet “Tirona e Nonës” dhe do të jetë një ‘milestone’ për t’u rikthyer tamam në skenën e hip-hopit. Shpejt do të publikoj dhe videoklipet me këngët përkatëse të EP-së. Kam vetëm një bashkëpunim me MC Kreshën, të tjerat janë single. Disa këngë i kam të përpunuara nga ato të vjetrat shqiptare, si për shembull të artistit legjendar shqiptar Rudolf Stamolla. Gjithashtu, si bonus track, do të rikthej dhe këngën “Tirona” sepse përshtatet shumë. Tani, përsa i përket datës ekzakte, nuk kam një konkrete për t’ju dhënë, por, para tetorit, do të jenë të publikuara të gjitha.