Për tre ditë, më 11 janar, nis regjistrimi i diasporës për zgjedhjet e 11 majit 2025. Ky është momenti për të marrë pjesë në të ardhmen e Shqipërisë, duke ushtruar një nga të drejtat më të rëndësishme demokratike – votën.
Regjistrimi bëhet shpejt dhe lehtë në platformën zyrtare të KQZ.
“Mos e lini pas dore këtë mundësi historike për të ndikuar në ndryshimin e drejtimit të vendit. Shqipëria ka nevojë për zërin tuaj!”, shkruan Jozefina Topalli në rrjetet sociale teksa i bën thirrje diasporës të votojë.
Jozefina Topalli:
Përse diaspora duhet të votojë më 11 maj 2025
Të dashur bashkëkombës, rëndësia e votës së diasporës në zgjedhjet e 11 majit 2025 shkon përtej aktit formal të votimit – ajo është një thirrje për të marrë pjesë aktive në të ardhmen e Shqipërisë. Diaspora shqiptare, e shpërndarë në mbarë botën, është një pasuri e jashtëzakonshme për atdheun tonë, dhe zëri i saj mund të jetë vendimtar për të ndryshuar një situatë kritike që ka mbërthyer vendin.
Shqipëria po përjeton një nga shpopullimet më të mëdha në historinë e saj, duke humbur jo vetëm numra por edhe energjinë, pasionin dhe fuqinë e njerëzve të saj më të rinj dhe më të mirë. Nëse ky trend vazhdon, e ardhmja jonë do të jetë në rrezik serioz. Përmes votës, ju mund të ndihmoni të krijohet një drejtim i ri, që ndalon largimin masiv dhe rikthen shpresën.
Artikull me interes edhe:
Vota juaj është fuqia që mund të sjellë ndryshimin. Është e drejtë dhe përgjegjësi për të ndihmuar në përmbysjen e një situate ku vendi ynë ka nevojë më shumë se kurrë për udhëheqje të përgjegjshme, reforma të thella dhe politika që përqafojnë diasporën jo si simbol, por si pjesë aktive të zhvillimit kombëtar.
Në 11 maj 2025, le të bëhet vota juaj një akt dashurie për Shqipërinë. Ju mund të jeni ndryshimi që vendi ka pritur. Koha është tani – një Shqipëri më e fortë dhe më e drejtë fillon me ju.