BULQIZË– Një i ri 28-vjeçar është arrestuar nga Policia e Bulqizës, pasi ishte shpallur në kërkim për disa vepra penale, mes tyre plagosje e lehtë me dashje, shkatërrim prone dhe vjedhje.
Në kuadër të punës për gjurmimin, lokalizimin dhe kapjen e personave në kërkim, si dhe bazuar në informacionet e siguruara në rrugë operative, shërbimet e Komisariatit të Policisë Bulqizë bënë të mundur kapjen dhe ndalimin e shtetasit D.T., 28 vjeç, banues në Bulqizë.
Sipas Policisë, në muajin shkurt 2025, pranë rrethrrotullimit të fshatit Fshat, 28-vjeçari ka dhunuar fizikisht shtetasin I.A., 51 vjeç, banues në Bulqizë. Pas konfliktit, ai i ka marrë automjetin dhe më pas e ka dëmtuar atë. Ndaj të riut rëndojnë akuzat për veprat penale “Plagosja e lehtë me dashje”, “Shkatërrimi i pronës”, “Vjedhja” dhe “Drejtimi i automjetit në mënyrë të parregullt”.
Gjykata e Dibrës ka caktuar ndaj tij masën e sigurisë “Arrest me burg” për veprat e mësipërme. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme procedurale./Radar.al