Gjykata e Posaçme e Shkallës së Parë ka vendosur masën e sigurisë “arrest në shtëpi” për avokatin Besart Logu, i dyshuar për veprën penale të ushtrimit të ndikimit të paligjshëm.
Vendimi u mor pas një operacioni të Byrosë Kombëtare të Hetimit (BKH), e cila ka kryer kontrolle në disa ambiente, përfshirë edhe zyrën e avokatit.
Sipas SPAK, Logu dyshohet se ka marrë 8 mijë euro nga një klient, S.C., me premtimin se do të ndikonte te prokurorët, gjyqtarët dhe ekspertët për të lehtësuar masën e sigurisë në një çështje që lidhej me mashtrime me TVSH, fshehje të të ardhurave dhe falsifikim vulash e formularësh. Hetimet tregojnë se kjo pagesë nuk ishte për shërbime ligjore, por për premtimin e ndërhyrjes te organet e drejtësisë – një premtim që nuk u realizua.
Procedimi penal i regjistruar nga SPAK më 27 nëntor 2024 ka për objekt veprat penale:
Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë (neni 319/ç i Kodit Penal)
Ushtrimi i ndikimit të paligjshëm ndaj personave që ushtrojnë funksione publike (neni 245/1 i Kodit Penal)
Hetimet proaktive dhe përdorimi i metodave speciale të hetimit kanë konfirmuar marrjen e shumës dhe qëllimin e saj për të influencuar procesin gjyqësor në favor të klientit të avokatit.
Masa e ekzekutuar më 10 shtator 2025 u mbështet nga Drejtoria e Përgjithshme e Policisë së Shtetit, duke vijuar procedurat për verifikimin e veprimtarisë së dyshuar të avokatit.
Njoftimi i SPAK
Me kërkesë të Prokurorisë së Posaçme kundër Korrupsionit dhe Krimit të Organizuar, Gjykata e Posaçme e Shkallës së Parë miratoi më 9.9.2025, përmes vendimit nr.91, caktimin e masës “Arrest në shtëpi”, ndaj shtetasit B. L., me profesion avokat, e parashikuar nga neni 237 i Kodit të Procedurës Penale. Kjo masë është kërkuar pasi ekzistojnë dyshime të arsyeshme, të cilat mbështeten në prova, se personi nën hetim ka kryer veprën penale, “Ushtrim i ndikimit të paligjshëm ndaj personave që ushtrojnë funksione publike”, parashikuar nga neni 245/1/4 i Kodit Penal.
Masa është ekzekutuar më 10.9.2025 me ndihmën e Drejtorisë së Përgjithshme të Policisë së Shtetit.
Procedimi penal
Në datën 27.11.2024, Prokuroria e Posaçme Kundër Korrupsionit dhe Krimit të Organizuar ka regjistruar procedimin penal nr. 242, mbi kallëzimin e shtetasit me iniciale S.C, për veprat penale:
“Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”, (neni 319/ç i Kodit Penal);
“Ushtrimi i ndikimit të paligjshëm ndaj personave që ushtrojnë funksione publike”, (neni 245/1 i Kodit Penal).
Hetimet dhe gjetjet
Nga hetimet proaktive, të cilat u kryen nga hetuesë të Byrosë Kombëtare e Hetimit (BKH) dhe Drejtoria e Përgjithshme Policisë së Shtetit, rezultoi se në datën 13.12.2024, i hetuari ka marrë shumën prej 8.000 (tetë mijë) euro, (fakt i dokumentuar përmes metodave speciale të hetimit). Kjo shumë është marrë me qëllim për të ndikuar te prokurori, gjyqtari dhe ekspertët që kishin në ngarkim çështjen penale në ngarkim të tij në Prokurorinë pranë Gjykatës së Shkallës së Parë të Juridiksionit të Përgjithshëm Tiranë. Çështja kishte të bënte me veprat penale, “Krijimi i skemave mashtruese lidhur me tatimin mbi vlerën e shtuar”, kryer në bashkëpunim“Fshehja e te ardhurave” dhe “Falsifikimi i vulave, stampave ose i formularëve”, kryer në bashkëpunim, parashikuar nga nenet 144/a e 25, 180/3 dhe 190/2 të Kodit Penal.
Hetimet kanë provuar se kjo shumë nuk ishte pagesë për shërbime avokatie, por një shumë e dhënë kundrejt premtimit se do t’u dorëzohej prokurorit, gjyqtarit dhe ekspertëve për lirimin nga burgu të klientit e tij, S. C.. Ky premtim nuk është realizuar.