Është zbardhur dëshmia e plotë e kamerierit Alteo Pepa, nga lokali ku ndodhi vrasja e dyfishtë në orët e para të mëngjesit në Manëz të Durrësit.
Kamerieri tregoi se Daniel Pepa dhe viktima Aranit Kurti erdhën në lokal dhe kërkuan kafe, por ekspresi ishte fikur. Kur klientët u acaruan, Flori Paluçi ndërhyri për të mbrojtur kamerierin, por situata degradoi dhe përfundoi me përdorimin e armëve.
“Daniel Pepa dhe Araniti kanë ardhur në lokal rreth orës 1:00-1:30 dhe kërkuan kafe. I thashë që s’ka kafe, sepse ekspresi ishte fikur. Ai u acarua dhe ndërhyri Flori, për të më dalë në krah. Nisi debati mes tyre, dolën jashtë dhe Flori qëlloi mbi Aranitin, ndërsa më pas Danieli qëlloi mbi Florin, duke e lënë të vrarë,” – tregoi kamerieri Pepa.
Hetimet për ngjarjen, që tronditi qytetin e Manëzit, vazhdojnë, ndërsa autoritetet po analizojnë skenën dhe dëshmitë për të sqaruar përgjegjësitë e sakta për vrasjen e dyfishtë.