Deputetët e Kuvendit të ri mund të marrin frymë lirisht – të paktën për momentin.
SPAK ka konfirmuar për Top Channel se nga verifikimi i bërë mbi emrat e 140 deputetëve të mandatuar pas zgjedhjeve të 11 majit, asnjëri prej tyre nuk është i regjistruar si person nën hetim në regjistrin penal të Prokurorisë së Posaçme.
Kjo përgjigje vjen pas pyetjeve të shumta publike dhe akuzave politike, sidomos gjatë fushatës elektorale. Top Channel i dërgoi SPAK-ut listën me emrat e shpallur nga KQZ, dhe përgjigjja zyrtare ishte e qartë:
“Emrat e përfshirë në listat e dërguara, nuk rezultojnë të jenë regjistruar deri tani si persona në hetim në regjistrin e njoftimit të veprave penale, në Prokurorinë e Posaçme kundër Korrupsionit dhe Krimit të Organizuar.”
Megjithatë, ekspertët penalistë theksojnë se kjo nuk do të thotë domosdoshmërisht mungesë e hetimeve. Praktika e SPAK-ut është që shpesh të regjistrojë një çështje pa emra të caktuar dhe vetëm më pas, kur mbledh prova, t’i shtojë individët konkretë në regjistër – shpesh duke çuar direkt në ngritjen e akuzave.
Aktualisht, vetëm disa figura të njohura politike ndodhen përballë drejtësisë: këtë vit janë ngritur akuza ndaj Ilir Metës, Erion Velisë, Monika Kryemadhit dhe Klotilda Bushkës, ndërsa Sali Berisha dhe Fatmir Mediu janë tashmë të pandehur në gjykatë.
Por për 140 deputetët e rinj, lajmi është “i pastër”. Kjo do të thotë se mazhoranca mund të presë me më pak stres formimin e kabinetit të ri dhe ndarjen e pushtetit në mandatin e katërt, ndërsa opozita ka hapësirë për t’u përqendruar në strategjinë e saj politike për periudhën 2025–2029.