Delegacioni i Bashkimi Evropian në Tiranë ka reaguar pas protestës së zhvilluar një ditë më parë në kryeqytet, duke shprehur shqetësim për aktet e dhunës dhe duke u bërë thirrje aktorëve politikë për vetëpërmbajtje. Përmes një postimi në rrjetet sociale, Delegacioni thekson se e drejta për tubim paqësor është një shtyllë themelore e çdo shoqërie demokratike, por duhet të ushtrohet me përgjegjësi dhe në respekt të plotë të sundimit të ligjit, si edhe të sigurisë së të gjithë qytetarëve.
Në reagim nënvizohet se aktet e fundit të dhunës në Tiranë rrezikuan jetë njerëzish, ndërsa theksohet nevoja për angazhim konstruktiv në funksion të reformave të rëndësishme në rrugën e Shqipërisë drejt integrimit evropian. Delegacioni i BE-së rithekson mbështetjen për proceset reformuese dhe apelon për një klimë politike të qetë dhe të përgjegjshme.
Reagimi:
Delegacioni i Bashkimit Evropian thekson se e drejta për tubim paqësor është një shtyllë themelore e çdo shoqërie demokratike. Ajo duhet të ushtrohet me përgjegjësi, në respekt të plotë të sundimit të ligjit dhe të sigurisë së të gjithë individëve.
Në këtë kontekst, Delegacioni i BE-së shpreh shqetësim për aktet e fundit të dhunës në Tiranë, të cilat rrezikuan jetë njerëzish.
Delegacioni i BE-së u bën thirrje aktorëve politikë të tregojnë vetëpërmbajtje. Ne mbështesim angazhimin konstruktiv në funksion të reformave të rëndësishme në rrugën e Shqipërisë drejt Bashkimit Evropian.