Një influencuese në rrjetet sociale është bërë subjekt i kritikave të ashpra, pasi u sugjeron prindërve të fëmijëve me autizëm që t’u japin dioksid klori – një substancë kimike e rrezikshme e njohur si zbardhues industrial – si një “trajtim” për këtë gjendje neurologjike.
Kerri Rivera, e ndjekur nga mbi 17,000 persona në Instagram, pretendon në mënyrë të rreme se autizmi shkaktohet nga “parazitët” dhe se kimikati i njohur si CD (chlorine dioxide) mund të ndihmojë në “shërimin” e fëmijëve. Ekspertët e kanë dënuar ashpër këtë praktikë, duke e quajtur “të rrezikshme, mashtruese dhe të dëmshme për shëndetin fizik dhe mendor të fëmijëve”.
Nga mesazhe të publikuara nga The Independent, prindër që kanë ndjekur udhëzimet e Rivera raportojnë efekte të rënda anësore, si të vjella, skuqje të lëkurës, kriza epileptike dhe erë të rëndë kimike në urinën e fëmijëve. Megjithatë, Rivera vazhdon të sigurojë ndjekësit se këto janë “shenja të përmirësimit” dhe “detoksifikimit”.
Pretendimet e saj janë hedhur poshtë nga autoritetet shëndetësore. Agjencia e Sigurisë Shëndetësore në Mbretërinë e Bashkuar paralajmëron se gëlltitja e këtij kimikati mund të shkaktojë dëmtime të rënda të brendshme, përfshirë djegie të traktit tretës, hemorragji dhe shok hipovolemik – një gjendje që mund të rrezikojë jetën.
Pas publikimit të raportit, TikTok konfirmoi çaktivizimin e llogarisë së saj. Ndërkohë, Meta është kontaktuar për koment në lidhje me përmbajtjen e saj në Instagram. Më herët, Amazon kishte hequr nga shitja libra dhe pajisje që promovonin këtë praktikë, pas reagimeve të forta nga komuniteti i aktivistëve dhe mjekëve.
Autizmi, theksojnë ekspertët, nuk është një sëmundje që ka shërim dhe nuk shkaktohet nga viruse apo parazitë. Ai është një gjendje neurozhvillimore e përjetshme që kërkon mbështetje dhe kuptim – jo trajtime të rrezikshme pa bazë shkencore.