Pasditen e sotme, bulevardi “Dëshmorët e Kombit” në Tiranë u shndërrua në skenë aksioni policor, kur disa të rinj në një automjet luksoz tip “Audi” me targa angleze u ndaluan nga forcat e maskuara të Policisë.
Tre persona u shtrinë në tokë dhe u prangosën, ndërsa efektivët kontrolluan automjetin me përkujdesje. Pamjet e ndërhyrjes, filmuar nga qytetarë që ndodheshin aty pranë, tregojnë një operacion të shpejtë dhe të koordinuar, duke lënë të habitur kalimtarët.
Një dëshmitar për JOQ Albania rrëfeu: “Sot përballë Piramidës. Nuk e di kush janë personat e arrestuar, por policët dukeshin të përgatitur dhe ishin nga forcat Operacionale.”
Burime nga Policia bëjnë me dije se aksioni lidhet me një kontroll rutinë, ndërsa të ndaluarit u shoqëruan në komisariat për verifikime të mëtejshme.
Pamjet kanë ngjallur kuriozitet mes qytetarëve, disa prej të cilëve menduan fillimisht se po filmohej një skenë për film.