Gjithnjë e më shumë përdorues po ndajnë histori personale dhe probleme emocionale me ChatGPT, duke e parë si një hapësirë të sigurt për të folur. Por Sam Altman, CEO i OpenAI, thotë se kjo bindje mund të jetë e rrezikshme: bisedat nuk janë aq private sa mendohet.
Në një intervistë për podcast-in This Past Weekend, Altman theksoi se ndryshe nga bisedat me një psikolog apo avokat, ato me inteligjencën artificiale nuk mbrohen nga ligji në të njëjtën mënyrë.
“Nëse bisedon me ChatGPT për gjëra shumë personale dhe më vonë ka një proces gjyqësor, mund të na detyrojnë t’i dorëzojmë ato biseda,” paralajmëroi ai.
OpenAI i ruan bisedat deri në 30 ditë dhe, në disa raste, mund t’i mbajë për arsye ligjore apo sigurie. Kjo do të thotë se nuk fshihen menjëherë, siç mendojnë shumë përdorues.
Altman kërkon një kuadër të ri ligjor që të mbrojë privatësinë e komunikimit mes përdoruesve dhe AI-së, duke e krahasuar me mbrojtjen që kanë terapistët apo mjekët.
Mesazhi i tij: “Mos e ngatërroni ChatGPT me një dhomë rrëfimesh sekrete – është një teknologji e fuqishme, por jo një terapist dhe jo një hapësirë tërësisht private.”