Që prej lançimit të ChatGPT në nëntor 2022, tregu global i punës për të rinjtë ka pësuar një rënie drastike, ku pozicionet e punës për të diplomuarit e rinj, praktikat profesionale dhe vendet fillestare që nuk kërkojnë diplomë janë tkurrur me gati një të tretën.
Një raport i ri nga platforma ndërkombëtare e kërkimit të punës Adzuna tregon se këto vende pune janë reduktuar me 31.9 për qind dhe përbëjnë aktualisht vetëm një të katërtën e tregut të përgjithshëm të punës, nga 28.9 për qind që ishte përpara dy vitesh. Rënia më e theksuar është regjistruar në sektorin e shitjes me pakicë, IT, kontabilitet dhe logjistikë, ku pozicionet fillestare janë më shumë se përgjysmuar që prej vitit 2022.
Kjo tkurrje lidhet ngushtë me përdorimin në rritje të inteligjencës artificiale nga bizneset që kërkojnë të ulin kostot dhe të rrisin efikasitetin, duke shmangur punësimet në nivelin e parë. Kompanitë po flasin hapur për planet e tyre për të zëvendësuar mijëra vende pune me teknologji të avancuar, ndërsa rritja e pagave minimale dhe kontributeve shtesë të sigurimeve e ka bërë edhe më pak tërheqës punësimin në këtë nivel.
Studimi paralajmëron se përparimet në IA mund të çojnë në zhdukjen e gjysmës së vendeve të punës për stafin e zyrave në nivelin bazë brenda pesë viteve të ardhshme, duke rritur ndjeshëm papunësinë mes të rinjve. Në këtë sfond, paga mesatare e ofertave të reja është rritur me 9.4 për qind, ndërsa koha për përzgjedhjen e kandidatëve është shkurtuar ndjeshëm, duke rritur konkurrencën dhe kufizuar mundësitë për ata që sapo hyjnë në tregun e punës.