Një operacion i gjerë antidrogë është zhvilluar mëngjesin e sotëm në qytetin e Korçës, ku Policia ka ndërhyrë në disa zona të dyshuara për zhvillimin e aktivitetit të paligjshëm të shpërndarjes së lëndëve narkotike.
Si rezultat i aksionit, janë vënë në pranga dy persona, të identifikuar si Renato dhe Albi Dishnica. Gjithashtu, disa të tjerë janë shoqëruar për t’u marrë në pyetje, ndërsa operacioni vijon ende.
Gjatë kontrolleve të ushtruara në automjetet dhe banesat e të arrestuarve, janë sekuestruar sasi lëndësh narkotike, përfshirë kokainë e ndarë në doza, e dyshuar për shitje.
Autoritetet kanë bërë të ditur se hetimet janë në zhvillim dhe priten arrestime të tjera në kuadër të këtij operacioni.