Të shumta janë reagimet që shpreshin trishtimin, dhimbjen por dhe habinë për lajmin e vdekjes kaq të parakohshme të ish deputetit të PD, Gerti Bogdani.
Radar.al sjell më poshtë postimet e ish kolegëve të Bogdanit, i cili u nda nga jeta më 18 shtator 2024, si pasojë e një arresti kardiak.
Presidenti Bajram Begaj:
Hidhërim për ikjen e beftë nga jeta të Gerti Bogdanit.
Ngushëllime familjes së tij, bashkëshortes, të afërme, miqve dhe kolegëve!
Gerti Bogdani, i angazhuar që në rininë e tij në jetën publike të vendit, promovoi vlerat më të mira në qeverisjen lokale, jetën parlamentare dhe atë politike, duke i shërbyer vendit, kauzës së të rinjve për përfshirjen e tyre në vendimmarrje dhe integrimit në BE.
Gazment Bardhi:
Familja jonë politike humbi sot një nga djemtë e saj më të mirë. Largimi para kohe i mikut Gert Bogdani na ka trishtuar pafund të gjithëve. Ngushëllime të sinqerta Edlirës, prindërve, familjes, dhe miqve për këtë humbje të madhe dhe shokuese! Ngushëllime edhe demokratëve që e respektuan dhe e vlerësuan për modelin e tij qytetar në politikë! Prehu në paqe mik i mirë!
Ogerta Manastirliu:
Tronditës lajmi për ndarjen e parakohshme nga jeta të Gerti Bogdanit.
Zoti i dhëntë forcë familjes së Gertit, për të përballuar këtë dhimbje të madhe! U prehtë në paqe!
Blendi Salaj
Ngushëllime fëmijëve, Edlirës, familjes dhe miqve të Gert Bogdanit. Një humbje e pabesueshme. Zoti ju dhëntë forcë ta përballoni. Në një vend ku shumica ulërin, Gerti ishte një zë normal, i qetë, i drejtë dhe njerëzor. Do të na mungojë. #GertBogdani
Juxhin Mustafaraj
Çfarë ishte kjo ikje Gert?
Gerti është nga miqtë e hershëm në nisje të profesionit tim si gazetar. Bashkëpunues, miqësor dhe i hapur për çdo qëndrim, kundërshti dhe debat që politika prodhonte. Do më mungojnë kafet te “Komiteti” Gerti dhe idetë e tua inovatore!
Prehu në paqe mik!
Si ndodhi vdekja e Gerti Bogdanit
Gerti Bogdani dyshohet se ndërroi jetë për shkak të një arresti kardiak. Ai ka qenë duke konsumuar kafe në ambientet e hotelit Rogner në Tiranë, kur ka shfaqur shqetësime.
“Kam probleme me frymëmarrjen”, iu është drejtuar ai miqve të tij, me të cilët po pinte kafen dhe është larguar për në tualet.
Por pasi është vonuar, miqtë e tij të shqetësuar shkuan në tualet dhe kanë hapur derën me forcë.
Ata e kanë gjetur ish-deputetin e PD-së të shtrirë përtokë dhe i kanë dhënë ndihmën e parë.
Më pas kanë lajmëruar ambulancën, por sipas dëshmitarëve është vonuar. Gerti Bogdani ka marrë ndihmën e parë mjekësore në ambulancë dhe më pas në QSUT, por nuk arriti që të mbijetojë.
Njoftimi i Policisë:
Më datë 18.09.2024, rreth orës 11:30, në ambientet e një hoteli në bulevardin “Dëshmorët e Kombit”, është gjetur pa ndjenja shtetasi G. B., 45 vjeç. Ky shtetas është transportuar në spital për ndihmë mjekësore, por ka ndërruar jetë.
Nga veprimet e kryera paraprakisht dyshohet se vdekja ka ardhur për shkaqe natyrale.
Grupi hetimor po punon për sqarimin e rrethanave të ngjarjes.